ANG BAGONG PAARALAN (Halaw kay Roque Dalton) (2026 Revision)

Sa sinaunang panahon ng mga Griyego
nagtuturo ng pilosopiya si Aristotle sa kanyang mga disipulo
habang palakad-lakad sila sa liseo ng Athens.

Dahil dito, tinawag na peripatetiko* ang kanyang paaralan.

Pero tayong mga mandirigmang makata
ay di hamak na magalugad kesa mga peripatetiko ni Aristotle.
Dahil tinutugis natin ang pilosopiya't panulaan ng masa
habang naglalagalag
sa mga kalsada't kabundukan ng ating bayan.


* Peripatetic School; Lagalag

MGA ALITAPTAP (Halaw Kay Mila D. Aguilar)

Na tumatawid
dito sa ilog
sa lilim ng gabi
papuntang poblacion
kaunting layo lang
sa kampo ng kalaban.
Walang imik,
nagsanga ang ating daan.

Dito sa ilog
tinabunan ng ningning
ng libong alitaptap
ang lalim ng gabi.
Nakapaligid, lumiligid.
Dito sa puno.
Dito sa ilog.

Kinakatok ng pighati
ang aking dibdib
sa pagwawalay
singtalas ng kislap
ng mga alitaptap.
Nangangako ng tagumpay
ng libo-libong tagumpay
sinusugatan nitong mga alitaptap
ang gabi, ang katahimikan.

Dito sa ilog
binabasag ng kislap
ng mga alitaptap
ang katahimikan, ang gabi.
Nakapaligid, lumiligid.
Dito sa puno.
Dito sa ilog.

GUSTO KO LANG SABIHING (Halaw kay William Carlos Williams)

Kinain ko na
ang mga ubas
na nasa
pridyeder

Baka kasi
hanapin mo
pa mamaya
panghimagas

Patawad
pagkalamig-
lamig kasi
pagkatamis-
tamis
pagkasarap-
sarap

HALAW KAY KOBAYASHI ISSA

Hampas-hangin 'yong
irit ng uwak. Sa 'kin,
haplos sa puso.

SA LILIM NG TALINGHAGA (Halaw kay Patrizia Cavalli)

sa lilim ng talinghaga
bigyan ako ng marapait
dahil, kahit paano, ang marapait
pwede kong hawakan.

_____________________________________________________


IN THE SHADOW OF A METAPHOR

In the shadow of a metaphor
give me a daisy
because I could hold the daisy
in my hand.

MAY NAGSABI SA AKIN (Halaw kay Patrizia Cavalli)

May nagsabi sa akin
na syempre, hindi mababago
ng aking tula ang daigdig.

Sabi ko, na syempre, hindi
mababago
ng aking tula ang daigdig.


_____________________________________________________

SOMEONE TOLD ME

Someone told me

that of course my poetry

won't change the world.

I answer that of course not

my poetry

won't change the world.

DAHIL TILA AKIN NA ANG ORAS (Halaw kay Patrizia Cavalli) (2025 Revision)

dahil tila akin na ang oras
at walang yumayaya sa aking
mananghalian o maghapunan
dahil malaya na akong
manguyakoy at masdan
kung paanong nagpapakawala't nawawalan
ng kulay ang ulap
o kung paanong may pusang taimtim
na nagmamatyag sa bubong
dahil ang naghihintay na lang sa akin
ay walang hanggang hangganan ng gabi
na walang naghahanap at walang

nag-aabang sa aking maghubad at magpahinga
sa mainit na kama't kasiping na katawan
dahil wala nang plano ang mga umaga
at binabayaan akong magpasya
kung paano magsimula, dahil ngayon
bigla, gusto ko na muling magpatali

WIKA (Halaw kay Edel Garcellano)

Ang mga sinasabi’y may katahimikan
na marami ring sinasabi at maaaring
meron o walang ibang ibig sabihin.
Totoo, may puwang sa mga usapan dahil
binibigo tayo ng mga nais nating sabihin.
Natatangay tayo sa agos ng mga salita
na para bang ang sinasabi’y nagtataksil
sa nais nating iparating. Pero ano nga
bang ilalaban natin sa mga kamay na
sumisikil at sumasakal sa atin? Nangi-
ngibabaw ang katahimikan. Pero kaila-
ngan nating magpatuloy, tuklasin ang
wikang magtutulay sa malawak na
banging namamagitan sa atin. Mabigat
ang ating tungkulin. Ang tula’y tula lamang.

MARTES, ALAS-9 N.U. (Halaw Kay Denver Butson)

May lalaking nakatayo sa waiting shed,
abala sa selpon. Nagliliyab siya,
may mga dilang-apoy na lumalawit
sa kanyang mga kuwelyo’t manggas.
Natutunaw ang kanyang mga sapatos.

Ang babaeng katabi niya,
gusto siyang kausapin,
sabihing nagliliyab siya.
Pero nalulunod naman
ang babae, umaapaw
ang tubig sa kanyang
bibig, sa mga tenga,
sa kanyang mga mata.
May ilog na tumatakas
mula sa blusa niya.

May isa pang babae sa waiting shed,
naninigas sa ginaw.
Sinubukan niyang tumabi sa lalaki
na nagliliyab
nang matunaw sana ang mga hibla
ng lamig na namumuo sa kanyang
mga pilikmata, at sa kanyang ilong.
Gusto niyang pigilin ang pangangatal
ng labi para kausapin ang babaeng
nalulunod, pero hirap gumalaw
ang babaeng giniginaw dahil
may mga bloke ng yelong namuo
sa kanyang mga paa.

Ilang saglit ang lumipas
bago makaakyat
sa pumarang bus
ang tatlo:
ang lalaking apoy,
ang babaeng tubig,
ang babaeng lamig.
Pero nang makasakay na
at makaupo, ni hindi sila
napansin ng kunduktor
na nilalagnat ng mga guniguni
at nagmumuni kung
ang lalaking pumara sa huling stop
ay ginugutay-gutay nga ba
ng mga asong naglalaway.

_____________________________________________________

Tuesday 9:00 AM
- Denver Butson

A man standing at the bus stop
reading the newspaper is on fire
Flames are peeking out
from beneath his collar and cuffs
His shoes have begun to melt

The woman next to him
wants to mention it to him
that he is burning
but she is drowning
Water is everywhere
in her mouth and ears
in her eyes
A stream of water runs
steadily from her blouse

Another woman stands at the bus stop
freezing to death
She tries to stand near the man
who is on fire
to try to melt the icicles
that have formed on her eyelashes
and on her nostrils
to stop her teeth long enough
from chattering to say something
to the woman who is drowning
but the woman who is freezing to death
has trouble moving
with blocks of ice on her feet

It takes the three some time
to board the bus
what with the flames
and water and ice
But when they finally climb the stairs
and take their seats
the driver doesn't even notice
that none of them has paid
because he is tortured
by visions and is wondering
if the man who got off at the last stop
was really being mauled to death
by wild dogs.

ANG BAGONG PAARALAN (Halaw kay Roque Dalton) (2025 Revision)

Noong sinaunang panahon ng mga Griyego

nagturo ng pilosopiya si Aristotle sa kanyang mga disipulo
habang naglalakad sa isang malawak na patio.

Dahil dito, tinawag na "lagalag" ang kanyang larangan.

Ngunit tayong mga mandirigmang makata
ay di hamak na lagalag kaysa lagalag ni Aristotle.
Pagkat tinutugis natin ang pilosopiya't panulaan ng masa
habang naglalagalag
sa mga lungsod at nayon ng ating bayan.

-Salin ni Aris Remollino
2017, Hunyo 15