PUSANG ITIM (Halaw kay Arvin Abejo Mangohig)

Sa buhay ko, gusto kong maniguro’t
kumampi sa liwanag. Mga bintana,
bukas na pinto. Puting-puting

Kutis ng kalaguyo kagabi. Kaya
nang dumating itong munting dilim
sa harap ng bahay, ayaw ko sanang

Patuluyin—hanggang buksan niya
ang kanyang mga mata: luntian
ang kaliwa, nagdurugong pula

Ang kanan. Ang malas mo, sabi ko,
habang marahang-marahang
hinahaplos ang anino ng munting anino.